Rev 22 | DOB | STEP | Ta 'enega anilose nina yawasida bwasina 'ie'itegu, bwasi nina matakadala 'ai'ailina, Yaubada be Lami 'idi 'ebemi esaesa 'enega 'idaudauma,

Revelation of John 22

1 Ta 'enega anilose nina yawasida bwasina 'ie'itegu, bwasi nina matakadala 'ai'ailina, Yaubada be Lami 'idi 'ebemi esaesa 'enega 'idaudauma, 2 ga 'asa nina gamwagamwaninega 'idaudolo. Ta bwasi nina tupitupina 'ediya yawasida kaiwenao sitootoolo. Kaiwe nidi uwadi nawalae 'ebweuna 'ebweuna dumadumadi be dumadumadi, 'enega yakwala 'ebweuna matuwelo siuwauwa, be yawanao boda maibo'adi bale'uya 'idi mulamula.

3 Ta esi yage gadilulu sida sawala 'asa nina 'enega, be Yaubada ta Lami nina 'idi 'ebemi esaesa 'ena sida miyami, be Lami nina 'ina topaisewao 'enaya sida guinuwa. 4 Be wate maninina sida 'ita, ta tauna 'ana esana debadiya.

5 Geya'abo wate boiboi, ta geya nuwadi sinala be mayale maedanidi, manuna 'Inapwana Yaubada tauna tuga 'idi maedana nina, ta sida loina ataya. v5 Et 21:23,25

Yesu 'ina mai

6 'Enega anilose nina 'ieonegu, 'igwae, “Ona getedi ona 'ai'aila ta palupaluna, manuna 'Inapwana Yaubada tauna yaluyaluwana 'ana to'ebwaya palopitao 'ediya, ga 'ina anilose 'ietunena be 'ina toguinuwao 'ediya 'ida e'ita to'ase 'iabe 'iapwesama manuna.”

7 Ta Yesu 'igwae, “Wa'ita! Ni'atu gete be yawawa, be taudi onaupaupao buki gete 'ena 'adi toematamatanao sida gwausowala.”

8 'Abo'agu Yoni yage getedi maibo'adi yanonodi, ta ya'itedi. Ta yage getedi sigumwalaya ga anilose nina 'aenaya yabe'u sanamwa'uta, tauna yage nidi 'ana toe'ita 'eguya, ga 'ena yabwagobwago.

9 'Enega tauna 'ieonegu, 'igwae, “Geya'abo nadigega, manuna 'abo'agu toguinuwa tuga nadigega 'oyo, ta tasidao taudi palopitao, ta wate taudi buki gete 'ana toematamatanao. Ta Yaubada esi 'ena 'uda bwagobwago.”

10 Ta wate 'ieonegu, 'igwae, “Geya'abo onaupaupa nidi buki gete solanaya 'ukwaikwaiyedi, manuna ni'atu tuta 'ilosabena, 11 be 'enega taudi toto'umalidi tuwa to'umalina 'ediya 'ida miyaataya, ta 'abo taudi 'idi bubuna baibailidi tuwa baila 'ediya 'ida miyaataya, ta 'abo taudi sibubuna bobo'ana 'idi bubuna 'ida bobo'ana ataya, ta taudi 'esasedi 'esasa nina 'ena sida miyaataya.

12 'Enega Yesu 'igwae, “'Iabe yawawa, be 'ami pali yame'edi be yada eguyai 'emiya, nadigega 'imi paisewa 'adi sinabwa, 13 manuna 'abo'agu 'ebe nugana ta 'ebe muliya, nai 'ebe e'ale ta 'ebe losalowa.” 14 Ta wada gwausowala 'abo yaisigedi 'omi 'ami 'oama wagie'esasedi, manuna yawasi kaiwena uwana wa'a'ani, be wate 'asa nina 'ana 'awao 'ediyega walulugu. 15 Ta 'asa nina 'atamaninaya 'adi tomiyanao, nate kedewao, be Taumudumudulele magosenao, be toloelatao, be toloemwawasao, be gulewa 'adi toemisao, be wate toekabokaboyao. 16 “'Abo'agu Yesu, ta 'igu anilose ni'atu yaetunenawa 'emiya, be yage getedi 'ida simanedi toekalesiyao 'emiya. 'Abo'agu Debida 'ina susuyega, ta 'abo'agu wate 'ubwana nina tuyayaligu.”

17 'Enega Yaluyaluwa Tabuna ta toai mewainena sigwae, “Wamai.” Be yaisigedi 'omi ona gete wanononaya, 'omi wate wada gwae, “Wamai.” Ta taudi tona'adi 'iyapasa sida mai, be 'enega yaisigedi taudi nuwanuwadi, yawasi bwasina sida 'ewadaisi be sinunuma. Nigeya 'ana maisamo.

'Ebe losalowa

18 'Omi buki gete 'ina onaupaupa 'ana toenonoyao gete 'ami emataluwa, 'aene geya'abo 'imi onega waloeloeposeyane, 'abona nai 'elouyao nidi buki gete solanaya 'isimanediya Yaubada 'ida loeposeyane 'emiya. 19 Ta wate geya'abo 'ebweu ona buki gete 'enega wa'ewa'ewa yaule, 'abona nai Yaubada wate 'ami egueguyai yawasi kaiwena 'enega 'ida 'ewayaule, ta wate 'imi 'ebemiya 'asa nina 'esasena solanaya, be yage yaudi bobo'adi buki gete 'ena 'isimanediya, 'emiyega 'i'ewa yauledi.

20 Ona gete 'ana tosimana 'igwae, “Tamo! Gete be yawawa.”

“Nadigega 'inapwana, 'uda ma, 'oyo Yesu.”

21 'Ida 'Inapwana nina Yesu 'ina nuwa'ole'ole, be 'ina oboboma, yauyaumi 'ana toemisao 'emiya. 1 Ko 16:22